Шомылу маусымының қызған шағында Маңғыстау облысы полиция департаментінің қызметкерлері өңір тұрғындары мен қонақтары арасында судағы қауіпсіздік ережелерін сақтау бойынша профилактикалық жұмыстарды күшейтті, — деп хабарлайды kazlenta.kz тілшісі Polisia.kz сайтына сілтеме жасап.
Іс-шаралар “Заң мен тәртіп” қағидаты аясында ұйымдастырылып, демалушыларға рұқсат етілмеген орындарда шомылудың қауіпі, белгіленген шекарадан асып жүзудің салдары, сондай-ақ балаларды су жағасында қараусыз қалдырмау қажеттігі түсіндірілуде. Биыл профилактикалық жұмыстарға заманауи технология да тартылды. Полиция қызметкерлерімен бірге жағалау аумағын робот-ит патрульдеуде. Ол камералар мен дауыс зорайтқыш жүйесінің көмегімен шомылуға тыйым салынған орындарда жүрген азаматтарды анықтап, қауіпсіздік талаптарын сақтау жөнінде ескертеді.
Талдау көрсеткендей, қайғылы оқиғалардың басым бөлігі арнайы жабдықталмаған және шомылуға тыйым салынған орындарда болады. Сонымен қатар судағы қауіпсіздік талаптарын бұзғаны үшін 90 азамат әкімшілік жауапкершілікке тартылды. Полиция азаматтарды тек арнайы рұқсат етілген жағажайларда демалуға, белгіленген қауіпсіздік шекарасынан аспауға, мас күйінде суға түспеуге және балаларды үнемі бақылауда ұстауға шақырады. Қарапайым қауіпсіздік ережелерін сақтау – адам өмірін сақтап қалудың ең тиімді жолы.