Алматыда 885 отбасы баспаналы болды. Жаңа қоныс иелеріне пәтер кілтін Алматы әкімі Дархан Сатыбалды мен «Отбасы банк» АҚ басқарма төрайымы Ләззат Ибрагимова табыстады, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Мемлекет басшысы Қасым-Жомарт Кемелұлы Тоқаевтың тапсырмасына сәйкес, азаматтарды қолжетімді тұрғын үймен қамтамасыз ету мемлекеттік саясаттың басым бағыттарының бірі болып қала береді. Осыған орай, 2026 жылы Алматыда тұрғын үйге мұқтаж 11 мыңнан астам азаматтың баспана жағдайын жақсарту жоспарланып отыр. Бағдарламаның алғашқы кезеңінде коммуналдық тұрғын үй қорынан 885 отбасы баспанамен қамтамасыз етіледі.
Жыл соңына дейін тағы 8663 отбасына пәтер беру көзделген. Жалпы, 2026 жылы 8250 азамат жалдамалы тұрғын үймен қамтамасыз етіледі, 1298 адам жеңілдетілген несие бағдарламалары арқылы пәтер сатып алу мүмкіндігіне ие болады, ал кемінде 1650 жас маман «Алматы жастары» бағдарламасы аясында жеке баспанасының иесі атанады. Әлеуметтік осал санаттағы азаматтар үшін ипотекалық несие рәсімдеу кезінде бастапқы жарнаның бір бөлігін өтеуге арналған тұрғын үй сертификаттары қарастырылған. Биыл осындай 200 сертификат беру жоспарланып отыр.
