Шығыс Қазақстан облысында полиция қызметкерлері жол-көлік оқиғаларының алдын алуға және жол қозғалысына қатысушылардың қауіпсіздігін қамтамасыз етуге бағытталған профилактикалық жұмыстарды жалғастырып жатыр, — деп хабарлайды kazlenta.kz тілшісі Polisia.kz сайтына сілтеме жасап.
Өткен аптада профилактикалық іс-шаралар аясында жол қозғалысы ережелерін бұзудың 3 мыңнан астам дерегі тоқтатылды, олар азаматтардың өмірі мен денсаулығына қауіп төндіруі мүмкін еді. Негізгі назар жолда ауыр зардаптарға әкелуі мүмкін ең қауіпті құқық бұзушылықтарды анықтауға аударылады. Анықталған фактілердің ішінде қауіпсіздік белдіктерін пайдалану ережелерін бұзу, рөлде отырып телефон пайдалану, жаяу жүргіншілерге басымдық бермеу, қарсы бағытқа шығып кету, сондай-ақ масаң күйде көлік басқару болды.
Мәселен, бір апта ішінде қауіпсіздік белдігін тақпаудың 744 фактісі, көлікті басқару кезінде телефонды пайдаланудың 389 жағдайы және жаяу жүргіншілерге жол бермеудің 180 дерегі анықталды. Сондай-ақ қарсы бағытқа шығудың 18 жағдайы және масаң күйде көлік құралдарын басқарудың 16 дерегі анықталып, тоқтатылды. Көлік құралдарын басқару құқығы жоқ жүргізушілерге айрықша назар аударылады. Апта ішінде осындай 7 факті анықталды: екі азамат жүргізуші куәлігінсіз көлік басқарса, үшеуі бұрын басқару құқығынан айырылғандар болып шықты, тағы екі жағдайда көлік құралдары тиісті құқығы жоқ адамдарға берілген. Облыс жолдарындағы профилактикалық жұмыстар жалғасуда. Полиция қызметкерлері автожолдар мен өңірдің елді мекендерінде қызмет атқарып, жүргізушілермен және жаяу жүргіншілермен түсіндіру жұмыстарын жүргізуде, сондай-ақ қауіпті жағдайлардың алдын алу шараларын қабылдап жатыр.