Астанада 21 маусым күні Халықаралық йога күніне арналған ауқымды мерекелік іс-шара өтеді. Жиын «Йога – салауатты ұзақ өмір сүру өнері» ұранымен ұйымдастырылады, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Мерекелік іс-шара 2014 жылы Үндістанның бастамасымен БҰҰ Бас Ассамблеясы бекіткен, Қазақстанды қоса алғанда 177 мемлекет қолдаған және жыл сайын 21 маусымда атап өтілетін халықаралық бастаманың аясында өтеді.
Мерекенің негізгі алаңы ретінде «Астана Арена» стадионының алдындағы аумақ таңдалған. Оған мемлекеттік органдардың, дипломатиялық корпустың, медицина және білім беру ұйымдарының, спорт қауымдастықтарының, йога орталықтарының өкілдері мен қала тұрғындары қатысады деп күтіліп отыр.
Бағдарлама аясында:
• 05:30 – қатысушыларды тіркеу және жиналу;
• 06:00 – «Сурья Намаскардың» 108 айналымын орындау;
• 08:00 – йоганың жалпы хаттамасы бойынша жаппай жаттығу өткізу жоспарланған.
Мереке қонақтарына Үндістаннан келген тәжірибелі нұсқаушылар сабақ өткізеді.
Қатысу үшін өзіңізбен бірге йогаға арналған төсеніш, бас киім алып келу қажет.
Іс-шараны Астанадағы Үнді мәдени орталығы мен Yoga Family Astana ұйымы қала әкімдігінің қолдауымен ұйымдастырып отыр.