Қарағанды облысында есірткі заттарының заңсыз айналымына қатысты қылмыстық іс бойынша жасөспірімге қатысты сот үкімі шықты, – деп хабарлайды kazlenta.kz тілшісі Polisia.kz сайтына сілтеме жасап.
Өткен жылдың қазан айында Пархоменко атындағы зауыт маңында серіктес қалалардың бірінің тұрғыны полиция қызметкерлерінің назарына ілінді. Ол синтетикалық есірткілерді жасырып кетуге арналған орындарды дайындау кезінде ұсталған. Тексеру барысында кәмелетке толмаған күдіктінің жанынан синтетикалық есірткі салынған 40 түйіншек тәркіленді. Сараптама қорытындысына сәйкес, тыйым салынған заттардың жалпы салмағы 17,576 грамды құраған. Аталған дерек бойынша аса ірі мөлшердегі есірткі заттарын өткізу мақсатында заңсыз сақтау фактісімен қылмыстық іс қозғалды.
Сотқа дейінгі тергеп-тексеру барысында барлық қажетті сараптамалар жүргізіліп, іс бойынша дәлелдемелік база толық жинақталды. Тергеу кезеңінде күдіктіге қатысты үйқамақ түріндегі бұлтартпау шарасы қолданылды. Сот отырысында жиналған дәлелдемелер, куәлардың айғақтары және сараптама қорытындылары жан-жақты қаралды. Істің мән-жайын және сотталушының жеке басын сипаттайтын деректерді ескере отырып, сот оны кінәлі деп таныды. Сот үкімімен жасөспірім 4 жыл 6 ай мерзімге бас бостандығынан айырылды. Үкім заңды күшіне енді. Аталған жағдай жастардың есірткі қылмыстарына тартылуының ауыр салдарын көрсетеді. Заңнамаға сәйкес, мұндай қылмыстар үшін кәмелетке толмағандар да қылмыстық жауапкершілікке тартылады.