Астананың Байқоңыр ауданында 1 маусым – Халықаралық балаларды қорғау күніне орай, «Халық қатысатын бюджет» жобасы аясында тағы бір абаттандырылған аула тұрғындардың игілігіне берілді. Республика даңғылы, 2/2 мекенжайында орналасқан аула толық жаңартылып, салтанатты түрде ашылды, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Ауланы абаттандыру барысында балаларға арналған ойын алаңдары орнатылып, спортпен шұғылдануға арналған аймақтар жабдықталды. Сонымен қатар тұрғындардың жайлы демалысы үшін орындықтар қойылып, аумақты көркейту жұмысы жүргізілді.
Мерекелік іс-шара барысында балалар үшін ойын-сауық бағдарламасы ұйымдастырылып, түрлі байқаулар мен қызықты ойындар өткізілді. Кішкентай тұрғындар көтеріңкі көңіл-күй сыйлаған мерекеге белсенді қатысып, жаңа алаңның игілігін көрді.
Аула аумақтарын жаңғырту және тұрғындарға қолайлы орта қалыптастыру жұмысы Байқоңыр ауданында жүйелі түрде жалғасып жатыр. Бұл бастамалар елорда тұрғындарының өмір сүру сапасын арттыруға және балалардың қауіпсіз әрі жайлы ортада демалуына бағытталған.
Айта кетейік, биыл Байқоңыр ауданында барлығы 70 аула аумағы абаттандырылады. Оның 20-сы кешенді абаттандырылса, 50-інде жөндеу-қалпына келтіру жұмысы жүргізіледі.
Осыған дейін кешенді абаттандырылған аулалардың 6-ы толығымен абаттандырылып, тұрғындар игілігіне тапсырылды.