Астана халықаралық әуежайында Бішкектегі көркем гимнастикадан Азия чемпионатында ел намысын абыроймен қорғаған қазақстандық спортшыларды салтанатты қарсы алу рәсімі өтті, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Тек елордалық спортшылардан құралған Қазақстан құрамасы құрлықтық біріншілік қорытындысы бойынша 15 медаль жеңіп алып, ел намысын халықаралық аренада лайықты қорғады. Жүлдегерлер қатарында Ақмарал Ерекешева, Айғаным Рысбек, Анель Дінішева, Анна Рубцова және басқа да елордалық гимнастар бар.
Әуежайда спортшыларды туған-туыстары, достары, бапкерлері мен жанкүйерлері қарсы алды. Олар үшін музыкалық аспаптармен, дәстүрлі дәммен, гүлдермен, тулармен мерекелік кездесу ұйымдастырылды.
Бішкекте өткен Азия чемпионаты елордалық спортшылар үшін табысты болды. Қазақстан қоржынында 2 алтын, 10 күміс және 3 қола медаль бар.
Мәселен, Линара Жайлауова шығыршықпен жаттығуда Азия чемпионы атанса, Анель Дінішева таспамен жаттығуда алтыннан алқа тақты. Ақмарал Ерекешева медальдар қоржынын үш марапатпен толықтырса, Анна Рубцова мен Айғаным Рысбек жекелеген бағыттар бойынша күміс жүлдегер атанды.
Астана қаласының №1 МОРМБЖМ аға жаттықтырушысы Меруерт Балғынбаева бұл чемпионат алдағы Азия ойындарына дайындықтың маңызды кезеңі болғанын атап өтті.«Бұл Азия чемпионаты біз үшін өте қиын өтті, өйткені ересектер командасына да, жасөспірімдер командасына да Астанадан барған спортшылар қатысты. Жалпы еліміздің атынан 8 ересек және 10 жасөспірім қатысты. Жаттықтырушы ретінде айтарым, біз нәтижелерге көңіліміз толады. Біз көптеген медальдарға қол жеткіздік. Азия чемпионатына арнайы келіп, барлық күндері команданың жанында болған ұлттық құраманың бас бапкеріне ерекше алғыс айтқым келеді. Бұл жаттықтырушылар үшін де, спортшылар үшін де өте маңызды – оның қолдауы мен құнды нұсқаулары қыздарымыздың лайықты өнер көрсетуіне көмектесті. Дәл осы құрам Азия ойындарында Қазақстан намысын қорғайтын болады. Азия чемпионаты біз үшін Әлем кубогы, Әлем чемпионаты және маусымның басты старты – Азия ойындарының алдындағы өзіндік сынақ кезеңі болды», – деді Меруерт Балғынбаева.
«Бүгін бізді осылай салтанатты түрде қарсы алуға келгендердің барлығына үлкен алғысымды айтамын. Мұндай тамаша атмосферада бұдан да көп мотивация пайда болады», – деп атап өтті жаттықтырушы.