Елордалық көркем гимнастшылар Әзербайжанда өткен «AGF Trophy» халықаралық турнирінде үздік нәтиже көрсетті, деп хабарлайды kazlenta.kz тілшісі қала әкімдігінің ресми сайтына сілтеме жасап.
Астана қаласы әкімдігінің №1 Балалар мен жасөспірімдердің мамандандырылған олимпиадалық резерв спорт мектебінің спортшылары турнирде тамаша өнер көрсетіп, ел қоржынын 3 алтын, 2 күміс медальға толтырды. Командалық көпсайыста Ақмарал Ерекешева мен Айғаным Рысбек 100.700 ұпай жинап алтын медаль жеңіп алды. Финалда Ақмарал Ерекешева доп, лента жаттығуын шеберлікпен орындап, 2 алтын медаль жеңіп алды. Ақмарал доп жаттығуында Грузия мен Әзербайжанды басып озып, 25.350 ұпай жинады. Ал шеңбер жаттығуы үшін 25.000 ұпай жинап, күміс медаль иеленді. Айғаным Рысбек ұршықпен өнер көрсетіп, күміс медаль еншіледі.