Алматыда 100 мыңнан астам оқушыны қамтитын жол қауіпсіздігі жобасы жүзеге асырылуда, - деп хабарлайды kazlenta.kz тілшісі Polisia.kz сайтына сілтеме жасап.
Алматы қаласының Наурызбай ауданындағы №221 жалпы білім беретін мектеп базасында "Балалар және жол: қауіпсіздік аумағы" жобасы аясында "Жол және қауіпсіздік аймағы" атты оқу-жаттығу іс-шарасы ұйымдастырылды. Аталған бастаманы Алматы қаласының прокуратурасы, әкімшілік полиция басқармасы, Алматы қаласы полиция департаментінің қоғамдық қауіпсіздік басқармасы және білім басқармасы бірлесіп өткізді. Жобаның негізгі мақсаты — өскелең ұрпақ арасында жолдағы қауіпсіз жүріс-тұрыс мәдениетін қалыптастыру, жол-көлік оқиғаларының алдын алу және балалардың өмір қауіпсіздігіне қатысты білім деңгейін арттыру.
Жоба аясында Алматы қаласындағы 100 мыңнан астам оқушыны қамту көзделіп отыр. Алдағы уақытта бұл тәжірибені республика көлемінде енгізу жоспарлануда. Іс-шара барысында оқушыларға тәжірибелік форматтағы сабақтар өткізілді. Онда жаяу жүргіншілерге арналған қауіпсіздік ережелері түсіндіріліп, жолдағы түрлі жағдайларға байланысты мысалдар талданды. Сонымен қатар төтенше жағдайлар кезіндегі әрекет ету алгоритмдері көрсетіліп, алғашқы медициналық көмек көрсету тәсілдері таныстырылды. Оқу-жаттығуға құқық қорғау органдарының қызметкерлері, білім саласының мамандары, оқушылар мен ата-аналар қатысты. "Балалар және жол: қауіпсіздік аумағы" жобасы — балалар қауіпсіздігін қамтамасыз етуге, сондай-ақ жол қозғалысына қатысушылардың жауапкершілігін арттыруға бағытталған мемлекеттік органдардың жүйелі жұмысының маңызды бөлігі.