БҚО-да цифрлық қауіпсіздік пен интернет-алаяқтыққа қарсы күрес мәселелері Telecommunications Day Conference алаңында көтерілді, - деп хабарлайды kazlenta.kz тілшісі Polisia.kz сайтына сілтеме жасап.
17 мамыр – байланыс және ақпараттандыру қызметкерлері күніне орай өңірде алғаш рет Telecommunications Day Conference іс-шарасы ұйымдастырылды. Конференцияға IT саласының мамандары, байланыс операторлары, мемлекеттік органдар өкілдері мен құқық қорғау қызметкерлері қатысты. Конференция барысында "Қолжетімді интернет" ұлттық жобасын жүзеге асыру, елді мекендерді жоғары жылдамдықты интернетпен қамту, республикалық және облыстық маңызы бар автожолдар бойында мобильді интернет желісін қосу мәселелері кеңінен талқыланды. Сонымен қатар цифрлық қауіпсіздік, киберқауіптердің алдын алу және интернет-алаяқтықпен күрес тақырыптарына ерекше назар аударылды.
Іс-шара барысында Батыс Қазақстан облысы полиция департаменті киберқылмысқа қарсы іс-қимыл басқармасының бастығы, полиция полковнигі Артур Мусагалиев қазіргі цифрлық қоғамдағы интернет-алаяқтықтың өзекті мәселелеріне тоқталды. Ол интернет арқылы жасалатын алаяқтық қылмыстарының түрлері жыл сайын күрделеніп келе жатқанын айтып, азаматтарды күмәнді сілтемелерге өтпеуге, бөгде адамдарға банк картасының деректерін бермеуге және жеке мәліметтердің қауіпсіздігіне бейжай қарамауға шақырды. Сонымен қатар полиция полковнигі киберқылмысқа қарсы күресте құқық қорғау органдары мен байланыс операторларының өзара іс-қимылы аса маңызды екенін атап өтті. Оның айтуынша, цифрлық сауаттылықты арттыру мен алдын алу шараларын күшейту — интернет-алаяқтыққа қарсы күрестегі басты бағыттардың бірі.