Алматы қаласының Туризм басқармасы мен қазақстандық FlyArystan әуе компаниясы туристік әлеуетті арттыру және шетелдік қонақтар санын көбейту мақсатында ынтымақтастық туралы меморандумға қол қойды, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Құжат аясында тараптар Алматыны шетелдік нарықтарда бірлесіп насихаттауды жоспарлап отыр. Негізгі бағыттардың қатарында маркетингтік кампаниялар, ақпараттық жобалар және қаланың халықаралық деңгейдегі тартымдылығын арттыруға арналған басқа да бастамалар бар.
Алматы қаласы Туризм басқармасының басшысы Ғалия Тоқсейітова халықаралық әуе қатынасының дамуы туристер санына тікелей әсер ететінін атап өтті. Оның айтуынша, бұл Алматының Орталық Азиядағы жетекші туристік бағыт ретіндегі орнын нығайта түседі.
«2025 жылы Алматыға шамамен 2,5 миллион турист келді, оның 754 мыңы шетелдік қонақтар. 2026 жылы бұл көрсеткіш 800 мыңнан асады деп болжанып отыр. Қазір қала еліміздегі ірі авиациялық хабқа айналып келеді: Алматы 60-тан астам халықаралық бағытпен тікелей байланысқан және Қазақстандағы халықаралық әуе тасымалының 60 пайыздан астамын қамтамасыз етеді. Бұл кірме туризмді дамытуға үлкен мүмкіндік береді», — деді ол.
Тараптар ұзақ мерзімді серіктестікті жалғастыруға ниетті. Бұл Алматыны Орталық Азиядағы қысқа мерзімді және біріктірілген сапарлар үшін қолжетімді әрі тартымды бағыт ретінде ілгерілетуге, транзиттік әлеуетін арттыруға және туристер географиясын кеңейтуге бағытталған.