Премьер-министрдің орынбасары – ұлттық экономика министрі Серік Жұманғариннің төрағалығымен өткен Салық кодексін енгізу жөніндегі жобалық кеңсенің 13-ші отырысында Қазақстанның резидент еместерінің аванс бойынша міндеттемелері түріндегі кірістерін тану мерзімдері мен шарттары қаралды, деп хабарлайды kazlenta.kz тілшісі Үкіметтің баспасөз қызметіне сілтеме жасап.
«Атамекен» ҰКП төрағасының орынбасары Тимур Жаркенов атап өткендей, жаңа Салық кодексінде (679-баптың 1-тармағының 5-тармақшасы) мұндай табысты тану мерзімі 24 айдан 12 айға дейін қысқартылды. Егер бейрезидент міндеттемелерін аванс төленген күннен бастап 12 ай ішінде не аванс төлеген заңды немесе жеке тұлға таратылған күнге дейін орындамаса, табыс халықаралық шарттың болуына және келісімшарттың қолданылу мерзіміне қарамастан алынды деп танылады.
Бұл норма капиталды көп қажет ететін және ұзақмерзімді жобалар үшін, оның ішінде мұнай химиясына және жүзеге асыру мерзімі 12 айдан асатын К-5/Еуро-5 стандартты отын компоненттерінің өндірісіне анағұрлым әсер еткіш болып келеді.
Талқылау барысында салық органдары мерзімдерді ұзарту кезінде теріс пайдалану тәуекелдері бар екенін жеткізді. Жиын қорытындысында Салық кодексіне ірі инвестициялық жобаларды жүзеге асыратын инвесторлар үшін, сондай-ақ әуе кемелерін сатып алатын авиакомпаниялар үшін ерекшелік түрінде резидент еместердің кірістерін тану мерзімін ұзарту мүмкіндігін көздейтін өзгерістерді енгізу туралы шешім қабылданды. Мұндай ерекшеліктерді қолдану қажеттілігі бейінді салалық министрліктің қорытындысымен расталатын болады.