19 сәуір күні Алматыда тоғызыншы Almaty Half Marathon өтті. Жарысқа әлемнің 44 елінен 10 000-нан астам желаяқ қатысып, Қазақстандағы ірі жүгіру маусымының шымылдығын ашты, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Биыл шетелдік қатысушылар саны бойынша рекорд тіркелді, 800-ден астам спортшы жиналды. Олардың басым бөлігі Ресей, Қырғызстан, Өзбекстан елдерінен, сондай-ақ Еуропа, Азия және АҚШ-тан келді.
Іс-шара аясында «Таза Қазақстан» жалпыұлттық бастамасына орай экологиялық акция ұйымдастырылды. Қалдықтарды бөлек жинау нүктелері орнатылып, экологиялық аймақтар жұмыс істеді. Жиналған қайта өңделетін қалдықтар өңдеуге жіберілді. Сонымен қатар бір реттік материалдарды пайдалану қысқартылды. «Жылу» қайырымдылық акциясы аясында қатысушылар мұқтаж жандарға қалың киімдер табыстады.
Мәреге жету аймағында қолайлы жағдай жасалды: ана мен бала бөлмесі және инклюзивті санитарлық аймақтар жұмыс істеді. Мұндай іс-шаралар бұқаралық спортты дамытып қана қоймай, экологиялық мәдениетті де қалыптастыруға ықпал етеді.