Алматыда 3 сәуірден бастап жылу беру кезең-кезеңімен тоқтатылды. Бұл шешім ауа райының жылынуына байланысты қабылданды: қалада сыртқы ауаның орташа тәуліктік температурасы бес күн қатарынан +8 градустан жоғары болып отыр, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Жылу жүйесін өшіру жұмыстары кезең-кезеңімен жүргізіледі. Алдымен әкімшілік ғимараттарда, кейін тұрғын үйлерде, ал ең соңында әлеуметтік нысандарда (мектептер, балабақшалар, ауруханалар) жылу тоқтатылады.
2025-2026 жылдардағы жылыту маусымы қалыпты режимде өтті. 39 шақырым жылу желісінің жаңғыртылып, 84 қазандықтың жаңартылуының арқасында энергия тұрақты әрі үздіксіз берілді.
Маусым барысында қала қызметтері жоғары дайындық режимінде жұмыс істеп, қаланың инженерлік инфрақұрылымының сенімділігін қамтамасыз етті.