Ақтөбеде дүкен қызметкері келушіні алаяқтардан құтқарып қалды, - деп хабарлайды kazlenta.kz тілшісі Polisia.kz сайтына сілтеме жасап.
10 наурыз күні Ақтөбе қаласындағы тұрмыстық техника сататын дүкендердің бірінде күтпеген жағдай орын алды. Жұмыс орнында жүрген дүкен менеджері келушілердің бірінің күмәнді әрекетіне назар аударған. Әлгі ер адам қатты қобалжулы күйде болып, үздіксіз телефон арқылы сөйлесіп жүрген. Қырағы қызметкер бұл жағдайға бейжай қарамай, ер адамның белгісіз адамдардың нұсқауымен әрекет етіп жүргенін және алаяқтардың психологиялық ықпалына түсуі мүмкін екенін аңғарған.
Жағдайды анықтау үшін араласқан кезде оның күдігі расқа айналады. Белгілі болғандай, ер адам телефон алаяқтарына 10 млн теңге аудармақ болған. Сонымен қатар ата-анасы отбасылық тойға арнап дайындаған барлық алтын бұйымдарды сатып, түскен ақшаны да қылмыскерлерге беруді жоспарлаған. Сол сәтке дейін ол алаяқтарға 800 мың теңгені аударып үлгерген. Жәбірленушіні құтқару үшін дүкен менеджері бірден "102" пультіне хабарласып, полиция қызметкерлері келгенше ер адамды телефондағы әңгімесін тоқтатуға және алаяқтардың нұсқауын орындамауға көндіруге тырысқан. Дүкен қызметкерінің қырағылығы мен жедел әрекетінің арқасында алаяқтық әрекеттің жолы кесілді. Нәтижесінде жәбірленушінің шамамен 9,2 млн теңге көлеміндегі қаражаты мен мүлкі сақталып қалды.