Алматыда "Сатып алушы" жедел алдын алу іс-шарасы барысында 32 ұрланған мүлікті сатып алғандар анықталды, – деп хабарлайды kazlenta.kz тілшісі Polisia.kz сайтына сілтеме жасап.
Алматы қаласында қылмыстық жолмен алынған мүлікті сатып алатын тұлғаларды анықтау және ұрланған заттардың өткізу арналарына тосқауыл қою мақсатында "Сатып алушы" жедел алдын алу іс-шарасы жүргізілді. Іс-шара нәтижесінде полицияға 32 адам жеткізілді. Аталған дерек бойынша ҚК-нің 196-бабы бойынша қылмыстық іс қозғалып, тергеу Алатау аудандық полиция басқармасының тергеу бөлімінде жүргізілуде. Іс-шара аясында қалта ұрылары да ұсталды. Қаланың қоғамдық көліктерінде және адамдар көп жиналатын орындарда әрекет еткен төрт қалта ұрысы ұсталды. Барлық факті бойынша сотқа дейінгі тергеу амалдары жүргізілуде.
- "Сатып алушы” іс-шарасының негізгі мақсаты – ұрланған мүліктің заңсыз айналымын тоқтату. Себебі, ұрланған мүлікті сатып алу қалта және пәтер ұрлықтарының көбеюіне ықпал етеді. 32 сатып алушы мен бірнеше қалта ұрысының ұсталуы – криминалдық полицияның жүйелі жұмысының нәтижесі, – деді Алматы қаласы ПД криминалдық полиция басқармасының бастығы Асхат Дәулетияров.