Астаналық альпинист Жәмилә Баширова Манаслуды (8163 метр) бағындырды. Бұл - биіктігі бойынша Жер бетіндегі сегізінші шың, - деп хабарлайды kazlenta.kz тілшісі Tengritravel.kz сайтына сілтеме жасап.
Спортшының айтуынша, экспедицияға дайындық бірнеше айға созылған және оған таудағы жорықтармен қатар, үнемі залда жаттығу да кіреді.
"Жай ғана тауға шыққың келіп, бірнеше рет залға кірсең дайынсың деген сөз емес. Бұл - тұрақты жұмыс: аптасына 3–4 рет жаттығу, жүгіру, төзімділікке шыңдалу. Тек солай ғана ағза биіктікке бейімделеді", - деді Жәмилә.
Шыңға шығу үшін топ 4 қыркүйекте Катмандуға барған, ал 6-сы күні белгіленген орынған ұшып кеткен. Суыққа бейімделіп, 6500 метрден жоғары биіктікте бірнеше түн өткізген соң топ жолға шыққан. Жәмиләның айтуынша, бастапқыда шыңға көтерілу 24 қыркүйекке жоспарланған, бірақ жоспар өзгерген.
"23-і күні тауға кешке көтеріліп, шыңда күннің батқанына куә болуды ұйғардық. Әдетте тауда күннің шығуын күтеді, ал біз күннің батқанын тамашалық", - деді ол.
Ауа райының нашарлауына қарамастан, топ шыңға жетіп, қараңғы түспей суретке түсіп үлгерген.
Альпинист "7 шың" жобасын аяқтауды жоспарлап отыр. Ол үшін әлі екі тау - Солтүстік Америкадағы Денали мен Африкадағы Килиманджаро қалған.
Спортшы Эверестке, Ленин шыңына, Аконкагуаға, Эльбрусқа (екі рет) және Винсонға көтерілген. Манаслу оның 7000 метрден асқан бесінші, ал сегізмыңдықтардың ішінде екінші шыңы болды.
"Армандар біздің өмірімізді жарық әрі мәнді етеді. Бүгін менің арманым орындалды. Бұл - тек менің сенімімнің ғана емес, сіздердің қолдауларыңыздың да жемісі", - деп түйіндеді ол.