Астанада Әйелдер істері және отбасылық-демографиялық саясат жөніндегі комиссияның отырысы өтті. Онда ерекше білім беру қажеттіліктері бар балаларды қолдау, мүмкіндігі шектеулі жандарды әлеуметтік бейімдеу және жастар арасындағы қауіпсіздік мәселелері қаралды, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Қала әкімінің орынбасары Есет Байкеннің төрағалығымен өткен жиынға аудан әкімдерінің орынбасарлары, басқарма басшылары, қоғамдық ұйымдар мен сарапшылар қатысты. Бүгінде Астанада 38 мыңнан астам мүмкіндігі шектеулі адам тұрады, оның ішінде 27 мыңы – ересектер, 10 мыңнан астамы – балалар. Қалада ерекше жандарға жан-жақты қолдау көрсетіледі: 2025 жылы бұл мақсатқа 29 мыңнан астам арнайы құрал-жабдықтар мен қызмет түрлері ұсынылды.
Жыл басынан бері Мансап орталығына 535 мүмкіндігі шектеулі жас жұмысқа орналасу үшін жүгінген. Оның 185-і әлеуметтік қорғау шараларымен қамтылды. Нәтижесінде 7 жас тұрақты жұмысқа тұрды, 122 жас қоғамдық жұмыстарға жіберілді, 37 жас «Бастау Бизнес» бағдарламасы аясында оқуын бастап, 3 жас жаңа бизнес-идеяға грант иегері атанды. Соңғы жылдары инватакси паркі үш еседен аса ұлғайып, бүгінде 129 көлік қызмет көрсетеді. Сондай-ақ, қалада 11 әлеуметтік мекеме және бірқатар ҮЕҰ мүмкіндігі шектеулі балаларға арнайы әлеуметтік қызметтер ұсынады. 2025 жылы мұндай қызметпен 7 800-ден астам адам қамтылған. Отырыста кәмелетке толмағандар мен жастар арасындағы қауіпсіздік шаралары да қаралды. Комиссия мүшелері балалардың құқықтарын қорғау саласындағы ведомствоаралық өзара іс-қимылды күшейту қажеттігін атап өтті.