Астана тұрғындары үшін қалада тағы бір қоғамдық кеңістік ашылды. Сарайшық ауданының Р.Қошқарбаев – Тəуелсіздік даңғылдары мен А. Байтұрсынов көшесі аралығындағы аумақта астаналықтар енді жаңартылған жолмен серуендеп, жаңадан пайда болған велосипед жолымен қатынай алады, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Жалпы биыл Астанада абаттандыру жұмысы қарқынды жүріп жатыр. Оның ішінде, Сарайшық ауданында тұрғындарға қолайлы жағдай жасау мақсатында бірқатар аула мен қоғамдық кеңістік жаңартылды.
Сонымен бірге, төртінші қоғамдық кеңістік – «Bravo Family» тұрғын үй кешені мен №93 мектеп-лицей жанында абаттандыру жұмыстары басталып кеткен. Әсіресе Р. Қошқарбаев – Тәуелсіздік даңғылдары мен А. Байтұрсынов көшесі аралығындағы орын ерекше құлпырып шыға келді. Оның үстіне, тұрғындардың қолайлылығы үшін 3 мың шаршы метр автотұрақ жасақталып, орындықтар қойылды. Көгалдандыру жұмысы аясында 140 түп ағаш отырғызылып, тағы 90 ағаштың орны дайындалды. Бұл аумақ гүлмен де көмкеріле түскен.
Мәселен, 3500 сәндік гүлді бұта егілген. Балалар мен жасөспірімдер үшін шағын сәулет нысандары қойылып, бұл кеңістік нағыз демалыс орнына айналды. Жалпы алғанда, «Сарайшық» ауданында экологиялық айлық шеңберінде 4 мың ағаш отырғызу жоспарланған. Жыл соңына дейін аудан аумағында 10 мыңнан астам ағаш пен 20 мың бұта егілмек. Осылайша, жаңа қоғамдық кеңістіктер мен жасыл желек тұрғындардың өмір сапасын жақсартуға, ал қаланың көркін айшықтай түсуге ықпал етпек. Айта кетейік, биыл елордада 170-ке жуық аула мен қоғамдық кеңістіктерді – саябақтар, гүлзарлар мен желекжолдарды абаттандыру көзделген. Жұмыс барлық ауданды, оның ішінде тұрғын алаптарды да қамтиды. Сонымен қатар, Астанада көгалдандыру белсенді жүргізіліп жатыр: 1 млн-нан астам жасыл желек отырғызу жоспарланған.
