21 қыркүйек күні сағат 10:00-ден 21:00-ге дейін Тұңғыш Президент саябағы үлкен open-air фестиваль алаңына айналады, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Қала күніне орай мұнда «Alma Fest 2025» – молшылықтың, мәдениет пен шабыттың мерекесі өтеді. 100 тонна алма! Аты аңызға айналған атақты апорттан сирек кездесетін сан алуан сұрыптарға дейін – барлығы бір жерде тоғысқан берекелі дастархан іспетті. Бұл жай ғана фестиваль емес, бұл Қазақстанның алма астанасы Алматыға деген сүйіспеншіліктің айқын көрінісі.Қонақтар үшін «Дос-Мұқасан», Карина Абдуллина, Astra, Royals Band және басты хедлайнер – TURAR өнер көрсетеді. Ән мен күй, эмоция, шаттық – сары ала күздің кешінде ерекше көңіл-күй сыйлайды. Этноаймақ, қолөнер жәрмеңкесі, крафт тағамдар, балмұздақ, ашық аспан астындағы кино, балалар аттракциондары, шеберлік дәрістері, цирк, VR-аймақ, спорт пен экоаймақ – отбасыға ортақ демалыс осында, - делінген хабарда.