Астанадағы мектептерде соңғы екі жылда инклюзивті білім беруді қолдау мақсатында 21 арнайы кабинет ашылды. Басты мақсат – барлық баланың тең дәрежеде сапалы білім алуына мүмкіндік жасау, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Қазіргі таңда 1054 ерекше білім беру қажеттілігі бар оқушы осы кабинеттерде заманауи жағдайларда оқып, әлеуметтік бейімделу мүмкіндігіне ие болып отыр. Инклюзивті кабинеттердің құрамына логопед, дефектолог және психолог бөлмелерімен қатар, қыш шеберханасы мен емдік дене шынықтыру кабинеті кіреді.
Астана қаласы Білім басқармасының бастамасымен биылдан бастап ерекше қажеттілігі бар балаларға кәсіптік білім беру жүйесі енгізіліп жатыр. Енді оқушылар бос уақытында өз қабілеті мен қызығушылығына сәйкес кәсіби бағыттарды меңгере алады. Мәселен, өсімдіктерді баптау, ас әзірлеу, тігіншілік сияқты салаларды үйрену мүмкіндігі қарастырылған.
Бұл бастама олардың болашақта еңбек нарығына бейімделіп, әлеуетін толық ашуына жол ашады.