Елордада Отбасы күні аясында Otbasy Fest атты кең ауқымды фестиваль ұйымдастырылды. Іс-шара «Жетісу» саябағында өтіп, оған қала тұрғындары мен қонақтары көптеп жиналды, деп хабарлайды kazlenta.kz тілшісі Астана әкімдігінің ресми сайтына сілтеме жасап.
Фестивальдің басты мақсаты – отбасы институтын нығайту, дәстүрлі құндылықтарды дәріптеу және жақындармен бірге уақыт өткізудің игі дәстүрін қалыптастыру. Мереке концерттік бағдарлама арқылы ашылды.Сонымен қатар ұйымдастырушылар отбасылық денсаулық пен тәрбиеге арналған сарапшылардың дәрістерін, ұлттық билер мен домбыра ойыны бойынша, йога және сурет салу бойынша шеберлік сабақтарын өткізді. Ерекше қызығушылық тудырғандар арасында «Супер әкелер іс үстінде» байқауы, отбасылық брейн-ринг пен «Кішкентай ғажайыптар шеруі» атты арбалар парады болды.
Балаларға аквагрим жасалып, ойын алаңдары ұйымдастырылды. Отбасылық мереке жүректер бейнелеген арт-перформанспен аяқталды. Бұл көрініс махаббат пен отбасы бірлігін білдіреді.
