Қазақстан Республикасының «Тұрғын үй қатынастары туралы» заңына енгізілген өзгерістер 2025 жылғы 15 қыркүйектен бастап күшіне енетін болады. Атап айтқанда, пәтер иелері кооперативтерінің (ПИК) қызметіне арналған 51-6-бап қолданысқа енгізіледі, деп хабарлайды kazlenta.kz тілшісі елорда әкімдігінің ресми сайтына сілтеме жасап.
ПИК қызметі тек заңмен ғана емес, сондай-ақ уәкілетті органмен бекітілетін ПИК-тің үлгі жарғысы негізінде реттелетін болады. Барлық ПИК бір жыл ішінде міндетті түрде қайта тіркеуден өтуі тиіс, бұл ретте әділет департаменттеріне жарғыны ұсыну талап етілмейді.ПИК бейкоммерциялық ұйым ретінде тіркеледі және сол мәртебеде қызмет атқарады. ПИК құру үшін бастамашы топ кондоминиум объектілерінің меншік иелерінің жиналысында делегатталған өкілдерден құралуы тиіс болады. Егер ПИК құрамына екіден астам көпқабатты үй кіретін болса, әрбір үйден өкіл жиналыс арқылы бөлек бекітілуі және оған меншік иелерінің мүдделерін білдіру құқығы берілуі қажет.ПИК-тің міндетті функциялары:
1. Пәтерлердің, тұрғын емес үй-жайлардың, қоймалар мен автотұрақ орындарының меншік иелерінің тізімін қалыптастыру;
2. Тұрғындардың қауіпсіздігі мен жайлы өмір сүру жағдайларын қамтамасыз ету;
3. Жалпы жиналыстарды ұйымдастыру және өткізу;
4. Коммуналдық қызметтер көрсетуге арналған шарттарды жасасу;
5. Жиналыстың және үй кеңесінің шешімдерін орындау;
6. Жиналысқа келесі құжаттарды дайындау және ұсыну:
• Жылдық шығыстар сметасының жобасы;
• Ай сайынғы және жылдық есептер.
7. Кондоминиум объектісі бойынша ағымдағы және жинақ шоттарын 15 күн ішінде ашу және оны басқару.
8. Барлық түрдегі жарналардың (оның ішінде қоймалар мен тұрақ орындары үшін) уақтылы төленуін бақылау.
9. Жазбаша сұрау салу негізінде меншік иелеріне келесі құжаттарды ұсыну:
• Шоттар бойынша көшірмелер;
• Қаржылық құжаттама;
• Есептер мен жиналыс хаттамалары (қағаз және/немесе электрондық түрде).
10. Коммуналдық қызметтердің сапасын бақылау.
11. Жылыту маусымына дайындық, лифтілер жұмыс жасауы мен қауіпсіздік жүйелерінің (өрт дабылы, түтін шығару және т.б.) жұмысын қамтамасыз ету.
12. ТКШ саласындағы электрондық ақпараттық жүйелерге деректерді енгізу.ПИК-тің кірістері тек жарғылық мақсаттарға бағытталуы тиіс. Пайданы қатысушылар арасында бөлуге жол берілмейді.