Алматыда инженерлік желілерді қайта жаңғырту жалғасуда. Әкім Дархан Сатыбалды негізгі нысандардағы жұмыстардың барысымен танысты, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
«Достық» шағынауданында 800 үйді қамтитын 15,7 шақырым су және кәріз желілері салынып жатыр. Қазірдің өзінде 1 шақырым су құбыры мен 8,5 шақырым кәріз желісі тартылды. Жобаны аяқтау мерзімі қазан айының соңына дейін қысқартылды. Алмалы ауданында Жамбыл–Жароков–Айманов–Қабанбай батыр көшелерінің аумағында апатты жылу желілері жаңартылуда.Жұмыстар соңғы кезеңде, аяқталу мерзімі – 2025 жылдың қыркүйегі. Бостандық ауданында Мыңбаев көшесіндегі су құбырлары қайта жаңғыртылуда. Жоба аясында шамамен 3 шақырым құбыр ауыстырылып, 33 құдық орнатылады. Сондай-ақ ТК 4-2 жылу торабы мен «Алмагүл-Оңтүстік» сорғы станциясының арасындағы жылу желілері жаңғыртылуда. Бұл жүйе 150-ден астам үйді жылу және ыстық сумен қамтамасыз етеді. Барлық нысан қала әкімінің ерекше бақылауында. Жобалардың жүзеге асуы алматылықтарды сапалы ауыз сумен, кәрізбен және жылумен қамтамасыз етуге мүмкіндік береді,-делінген хабарламада.