Маңғыстау облысында полицейлер суға батып бара жатқан қызды құтқарып қалды, – деп хабарлайды kazlenta.kz тілшісі Polisia.kz сайтына сілтеме жасап.
18 тамызда шамамен 18:30-да Түпқараған аудандық полиция бөлімінің кезекші бөліміне Шапағат ауылындағы жағалауда жасөспірім қыздың теңізге түсіп, өздігінен жағаға шыға алмай жатқаны жөнінде хабарлама келіп түсті. Оқиға орнына бірден учаскелік полиция инспекторлары — Данияр Назарбаев ,полиция капитаны Біржан Шапағатов және полицияның аға лейтенанты Дулат Ғайнуллин шұғыл жетті. Жергілікті тұрғындармен бірлесе отырып, қайық табылып, полицейлер теңізге шықты. Қыз бала шамамен жағалаудан 600 метр қашықтықта болған. Оны қайыққа мінгізіп, сәтті түрде жағаға жеткізді.
Абырой болғанда, жасөспірім ешқандай дене жарақатын алмады. Бұл оқиға — полиция қызметкерлерінің жеделдігі мен жанқиярлығының жарқын үлгісі ғана емес, сонымен қатар азаматтардың өмірін, құқықтары мен қауіпсіздігін қорғауға бағытталған "Заң және тәртіп" қағидатының нақты іске асуының айғағы болды.