Қостанай облысында полиция қызметкерлері ер адамды жанып жатқан ғимараттан құтқарып қалды, – деп хабарлайды kazlenta.kz тілшісі Polisia.kz сайтына сілтеме жасап.
13 шілде күні түнгі сағат 03:09 шамасында Алтынсарин ауданы, Щербаков кентінде орналасқан бос тұрған ғимараттың шатырынан өрт шыққаны туралы өрт сөндіру бөліміне хабар түсті. Оқиға орнына дереу өрт сөндіру тобы барып, қызыл жалында ауыздықтау жұмыстарын бастап кетті. Көп ұзамай оқиға орнына учаскелік полиция инспекторлары Дулат Нұрумов пен Амантай Кенжебаев келіп жетті. Батылдық пен бастамашылдық танытқан полиция қызметкерлері аумақты тексеру үшін қазандық бөлмесіне кірді. Тексеру барысында олар қою түтіннің ішінде ұйықтап жатқан ер адамды байқап қалады.
Уақыт жоғалтпай, оны қауіпті аймақтан шығарып, өмірін сақтап қалды. Полиция қызметкерлерінің жанқиярлығы мен өрт сөндірушілердің жедел әрекеттері арқасында қайғылы жағдайдың алдын алуға мүмкіндік туды. Ер адам ешқандай жарақат алмады және дәрігерлерге тексерілу үшін тапсырылды. Бұл оқиға төтенше қызметтердің үйлесімді жұмысы мен өзгенің өмірін сақтау жолында өмірін қатерге тігуден тайынбайтын полиция қызметкерлерінің кәсіби біліктілігінің айқын үлгісі болды.