Астанада 16-17 тамыз күндері Тәжікстан Республикасының Соғды облысының ауыл шаруашылығы өнімдері мен халық қолөнері бұйымдарының жәрмеңкесі өтеді, деп хабарлайды kazlenta.kz тілшісі Астана қаласы әкімдігінің ресми сайтына сілтеме жасап.
Тәжікстан кәсіпкерлері ауыл шаруашылығының 1 000 тоннадан астам өнімін сатуға әкеледі: жеміс-жидек, құрма, жаңғақ, көкөніс, бақша өнімдері және өзге де дәнді-дақылдар.
Жәрмеңкеде ұлттық ас мәзірі де ұсынылады:
• 10 қазанда палау (күніне кемінде 1 тонна палау);
• 6 тандырда нан мен самса (күніне кемінде 5 000 дана тағам).
Іс-шараның мақсаты – кәсіпкерлерді қолдау және дамыту, сондай-ақ халықаралық ынтымақтастықты нығайту.
Ғасырлар бойы тәжік мәдениеті парсы мен түркі әлемінің дәстүрін бойына сіңіріп келген. Тәжікстанның басты ерекшеліктерінің бірі – Шығыстың рухын жеткізетін түрлі-түсті базарлар.
Іс-шара елорда тұрғындары мен қонақтарына сапалы өнімдер мен шеберлердің бұйымдарын сатып алуға ғана емес, сонымен қатар шығыс базарының ерекше атмосферасын сезініп, шығыс асханасының дәмді тағамдарынан дәм татуға мүмкіндік береді.
Жәрмеңке 16 тамыз күні 11:00-ден 19:00-ге дейін, ал 17 тамыз күні 10:00-ден 19:00-ге дейін «Барыс Арена» маңындағы аумақта өтеді.