Астанадағы №109 мектепте жазғы лагерь аясында ерекше шара өтті. Мектепке оқушылармен тілдесетін, олардың қозғалысын сезе алатын ақылды робот «Темірбек» келді, деп хабарлайды kazlenta.kz тілшісі елорда әкімдігінің ресми сайтына сілтеме жасап.
«Темірбек» – заманауи жасанды интеллект элементтерімен жабдықталған робот. Ол сөйлеу, сұраққа жауап беру, адамды қашықтан сезу секілді мүмкіндіктерге ие. Робот STEM бағыты бойынша өтіп жатқан үйірмеге қатысып, оқушылармен еркін байланыс орнатты. Мектеп директоры Жанар Ермұхамбетова бұл кездесудің мақсатын былайша түсіндірді:
«Басты мақсат – оқушыларды болашақ технологияларына қызықтыру, осындай құрылғыларды өз қолымен жасауға ынталандыру. Мұндай кездесулер балалардың шығармашылық қабілетін дамытып, жаңа идеяларға шабыт береді», – деді мектеп директоры.
Ал №74 мектеп-гимназиясының информатика пәні мұғалімі Айдана Айтжанова роботтың ерекшелігіне тоқталды:
«Темірбек» – мектебіміздің 7 және 11-сынып оқушылары төрт айда жасап шығарған жобасы. Қазір ол ашық сабақтар мен іс-шараларда гид ретінде белсенді қатысып жүр. Болашақта оны толық қозғала алатын, тапсырма орындай алатын деңгейге жеткізу жоспарланып отыр», – деп атап өтті.
