2025 жылғы 24–29 маусым аралығында Солтүстік Македонияның Струга қаласында жасөспірімдер арасындағы математикадан Балқан олимпиадасы (JBMO) өтеді, деп хабарлайды kazlenta.kz тілшісі ҚР Оқу-ағарту министрлігіне сілтеме жасап.
Беделді жарысқа Албания, Босния және Герцеговина, Болгария, Кипр, Грекия, Молдова, Черногория, Румыния, Сербия, Македония және басқа да 20-дан астам елден 16 жасқа толмаған оқушылар қатысады.
Қатысушылардың қатарында — еліміздің ұлттық құрамасы да бар.
Географиялық тұрғыдан Балқан өңірінен тыс орналасқанына қарамастан, Қазақстан 2004 жылдан бері JBMO-ға қонақ ел мәртебесінде тұрақты түрде қатысып келеді.
Еліміздің намысын республикалық және халықаралық олимпиадалардың жеңімпаздарынан құралған алты үздік оқушы қорғайды: Нұртай Мәлік (9-сынып, «Білім-инновация», Ақтөбе қ.), Ануар Ағыбаев (9-сынып, Nurorda, Алматы қ.), Александр Олейников (9-сынып, Nurorda, Алматы қ.), Жәңгір Булат (8-сынып, РФМШ, Алматы қ.), Батырхан Бейганов (9-сынып, РФМШ, Алматы қ.), Мирас Кенесбек (9-сынып, «Білім-инновация», Қарағанды қ.).
Құраманың жетекшілері -
Сергей Полянских және Перизат Саутбекова.
Еске сала кетейік, 2024 жылы Түркияның Анталья қаласында өткен олимпиадада Қазақстан құрамасы 6 медаль — 2 алтын, 3 күміс және 1 қола жүлде жеңіп алған болатын.
Қазақстандық жас математиктерге сәттілік пен жарқын жеңістер тілейміз!