Телефон сатып алмақ болған павлодарлық тұрғын 1 млн теңгеден астам қаражатын алаяқтарға аударған, - деп хабарлайды kazlenta.kz тілшісі Polisia.kz сайтына сілтеме жасап.
Интернет сауданың дамуымен бірге алаяқтық әрекеттер де өршіп келеді. Бұл — уақыт пен қаржы үнемдеудің заманауи мүмкіндігін іздеген азаматтардың сенімін пайдалану арқылы жасалатын қылмыстардың жиі көрінісі. Павлодар облысы полиция департаментінің мәліметінше, әлеуметтік желілер, әсіресе Instagram платформасы алаяқтар үшін қолайлы ортаға айналып отыр. Соңғы мысал — Павлодар қаласының тұрғыны Instagram желісіндегі парақша арқылы 2 дана iPhone 16 Pro Max ұялы телефонына тапсырыс беріп, көрсетілген шотқа 1 160 000 теңге аударған. Алайда тауар келмей, сатушының парақшасы бұғатталып кеткен. Қазіргі уақытта полиция күдіктілерді анықтауға бағытталған жедел-іздестіру шараларын жүргізіп жатыр. Осыған байланысты полиция тұрғындарды интернет арқылы сауда жасау кезінде барынша сақ болуға шақырады.
Мынандай қарапайым ережелерді есте ұстау ұсынылады:
- Сатып алудан бұрын сатушы туралы пікірлерді мұқият оқыңыз;
- Карта деректерін бөгде адамдарға ешқашан бермеңіз;
- Интернет-сауда үшін жеке, аз көлемдегі қаражатпен карта ашыңыз;
- Төлемді тауар қолыңызға тиген соң жасауды таңдаңыз;
- Сайттың мекенжайын мұқият тексеріңіз – жалған сілтемелерде жиі қателер болады.
Азаматтарды алаяқтық әрекеттерден қорғау – ортақ міндет. Күдік тудырған жағдайда дереу құқық қорғау органдарына жүгінуге кеңес беріледі.