Алатау ауданының тұрғындарымен кездесуде Алматы әкімі Ерболат Досаев қалада шұңқырлы жөндеу жұмыстарын орындайтын мердігерлерге қойылатын талаптар күшейтілетінін мәлімдеді, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Қалалық мобильділік басқармасының басшысы Сағындық Телібаев айтқандай, ережеге сәйкес, егер асфальт қырылып алынса, оны сол күні қалпына келтіру қажет. Алайда барлық мердігер бұл мерзімді сақтай бермейді, олар асфальт жеткізудегі кідірістер мен техника тапшылығын сылтауратады.Әкім атап өткендей, талаптардың келісімшартта нақты көрсетілген, аудан әкімдіктері олардың орындалуына бақылауды күшейтеді. Сондай-ақ, Досаев тұрғындарға «е-Otinish» платформасы, Open Almaty қоғамдық қабылдауы немесе жол инфрақұрылымына қатысты мәселелерге арналған @AlmatyJolybot Telegram-чат-боты арқылы шағымды жолдауға болатынын еске салды.