ШҚО-да қос азаматтықтың 16 фактісі анықталды, – деп хабарлайды kazlenta.kz тілшісі Polisia.kz сайтына сілтеме жасап.
Шығыс Қазақстан облысында полиция қызметкерлері азаматтардың екі елдің төлқұжатын иелену фактілерін анықтады. Жыл басынан бері басқа мемлекеттің азаматтығын алғаны туралы ішкі істер органдарына хабарламаған 16 адам анықталып, олардың екеуі елден шығарылды. Осындай жағдайлардың бірі – өңір тұрғыны 2021 жылы көрші елдің азаматтығын алғанымен, Қазақстанның көші-қон қызметіне белгіленген мерзімде хабарламаған. Оның айтуынша, құжаттарды тапсыру қажеттігін білмеген және отбасылық жағдайлар Қазақстанға уақытылы оралуына мүмкіндік бермеген. Сот оны елден шығару туралы шешім шығарды.
Естеріңізге сала кетейік, 2025 жылы наурыз айынан бастап Қазақстанда азаматтығынан айырылған тұлғалардың ҚР құжаттарын пайдалануына қатысты заңнамаға өзгерістер енгізіліп, жауапкершілік күшейтілді. Енді аталған құқық бұзушылық үшін айыппұл мөлшері 100 АЕК-тен 200 АЕК-ке дейін артты. Полиция Қазақстан заңнамасына сәйкес, басқа елдің азаматтығын алған азаматтар 30 күн ішінде көші-қон қызметіне хабарлап, бұрынғы азаматтығын растайтын құжаттарды тапсыруға міндетті екенін ескертеді. Бұл талапты бұзғаны үшін әкімшілік жауапкершілік қарастырылған.