Павлодар облысында қос азаматтығы бар тұрғын елден шығарылды, - деп хабарлайды kazlenta.kz тілшісі Polisia.kz сайтына сілтеме жасап.
Қазақстан заңнамасына сәйкес, азаматтар бір мезгілде екі немесе одан да көп мемлекеттің азаматы бола алмайды. 2024 жылдың қорытындысы бойынша Павлодар өңірінде 1387 адам Қазақстан азаматтығынан айырылды. Олардың 1362-сі өз еркімен басқа елдің азаматтығын алғанын хабарлаған. Мәселен, полиция қызметкерлері 54 жастағы Қазақстан азаматының көрші елдің азаматтығы барын анықтады. Бұл дерек бойынша сот ісі қаралып, нәтижесінде Железин ауданының тұрғыны елден шығарылды. Сондай-ақ оған Қазақстанға бес жыл бойы кіруге тыйым салынды. Павлодар қаласында тағы бір осындай құқық бұзушы анықталды. Ол АҚШ азаматтығын алғанын тиісті органдарға хабарламаған. Сот шешімімен ер адам кінәлі деп танылып, оған шамамен 800 мың теңге көлемінде әкімшілік айыппұл салынды. Заң талаптарын бұзған әрбір азамат міндетті түрде жауапкершілікке тартылады. Қазақстанда құқықтық тәртіпті сақтау және азаматтардың қауіпсіздігін қамтамасыз ету – ішкі істер органдарының басты міндеті. Қос азаматтыққа жол бергендер заң алдында жауап береді.