Алматыда медициналық-әлеуметтік мекемелердің қызметкерлеріне 2015 жылдан бері алғаш рет лауазымдық жалақысына 30% үстемеақы қосылады, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Бұл шешім мәслихаттың XXVIII сессиясында депутаттар тарапынан қолдау тапты. Қосымша төлемдерді 1 632 қызметкер алады, алайда медицина қызметкерлеріне бұл өзгеріс қатысты емес.Әлеуметтік қызметкерлердің жұмысы маңызды болғанымен, олардың жалақысы төмен деңгейде қалып отыр. Үстемеақының енгізілуі қызметкерлердің ынтасын арттырып, әлеуметтік мекемелердегі кадр тұрақтылығын қамтамасыз етеді. Бауыржан Жаубасов, Алматы қалалық жұмыспен қамту және әлеуметтік бағдарламалар басқармасының басшысы:«Жалақының төмен болуына байланысты әлеуметтік қызметкерлер арасында білікті мамандардың кетуі байқалады. Бұған кәсіби күйзеліс пен жеке сектордағы жоғары жалақы бәсекелестігі әсер етеді».Қазіргі уақытта Алматыда 13 әлеуметтік мекеме жұмыс істейді. Олар ерекше қажеттілігі бар адамдарға, жалғызбасты қарттарға және өмірінде қиындық болып жатқан азаматтарға көмек көрсетеді.