Бұл шешім Алматы қаласы мәслихатының кезектен тыс сессиясында қабылданды, деп хабарлайды kazlenta.kz тілшісі BAQ.KZ сайтына сілтеме жасап.
Алматыда қалалық мәслихаттың кезектен тыс XVI сессиясы өтті. Депутаттар алдында баяндама жасаған Алматы қаласы Жұмыспен қамту және әлеуметтік бағдарламалар басқарма басшысы Бауыржан Жаубасов Екінші дүниежүзі соғысы ардагерлеріне төленетін бір реттік төлем мөлшерін көбейтуді ұсынды.
Алматы қаласы мәслихатының бұрын бекітілген шешімі бойынша Екінші дүниежүзі соғысы ардагерлеріне 1 миллион теңге көлемінде бір реттік көмек берілетін. Өткен жылы айтылған көмекті 56 ардагер алды. Қазіргі уақытта Алматы қаласының аумағында 44 ардагер өмір сүріп жатыр. Осы орайда Алматы қаласы әкімінің тапсырмасымен бір реттік төлем мөлшерін 2 миллионға дейін өсіруді ұсынамын, – деді Бауыржан Жаубасов.
Мәслихат депутаттары ортаға салынған ұсынысты қолдап, бірауыздан шешім қабылдады. Жеңістің 79 жылдығына орай биыл алматылық ардагерлерге 2 миллион теңге төленетін болады.