Павлодарда полиция түнгі уақытта үйінен тыс жерде жүрген 145 жасөспірімді анықтады, - деп хабарлайды kazlenta.kz тілшісі Polisia.kz сайтына сілтеме жасап.
Павлодарда полицейлер биыл "Өзіңнен баста!" атты акцияны іске қосты. Бұл бастама азаматтарды заңға бағынуға, өз әрекеттерінің салдары туралы ойлануға және жауапкершілікті сезінуге шақырады. Жасөспірімдерге де құқық бұзушылықтан аулақ болу ескертілуде.
Тәртіп сақшылары күн сайын көшелерде, қоғамдық орындарда және түрлі мекемелерде рейдтер жүргізуде. Осындай тексерулер барысында түнгі уақытта заңды өкілдерінсіз тұрғын үйден тыс жерде жүрген 145 жасөспірім анықталды. Олардың сегізі ойын-сауық орындарында болған. Мысалы Успен ауданында бір жасөспірім түнгі уақытта ата-анасының қарауынсыз көшеде жүрген. Ата-анасы үйде болғанымен, заңға сәйкес, баласының түнгі уақытта үйден тыс жерде болуына жол бергені үшін анасы әкімшілік жауапкершілікке тартылды. Павлодар қаласында Қайырбаев көшесіндегі компьютерлік клуб тексерілген кезде, ондағы келушілер арасында кәмелетке толмаған бала анықталды. Бұл үшін ата-анасынан бөлек, мекеме иесіне де 10 АЕК мөлшерінде айыппұл салынды. "Заң және тәртіп" қағидаты ішкі істер органдарының азаматтардың қауіпсіздігін қамтамасыз етуге, қоғамдық тәртіп пен жол қозғалысы қауіпсіздігін сақтауға бағытталған қызметінің негізі болып қала береді. Құқық бұзушылар өз әрекеттері үшін міндетті түрде жауапқа тартылады.