Өткен жылы Алматыда 2,5 мыңнан астам азамат көлік басқару құқығынан айырылды, – деп хабарлайды kazlenta.kz тілшісі Polisia.kz сайтына сілтеме жасап.
Өткен жылы Алматыда 6 мыңнан астам жол-көлік оқиғасы тіркеліп, соның салдарынан 105 адам қаза тапты, 7 мыңнан астамы жарақат алды. Қаладағы жол-көлік оқиғаларының тіркелуіне автокөлік қозғалысының тығыздығы әсер етеді: қала сыртынан кіретін көліктерді есепке алғанда, шаһар жолдарында күн сайын 1,5 миллионнан астам көлік жүреді. Сонымен қатар жол апатының деңгейіне баламалы көліктердің: мопедтер мен электрсамокаттардың көп қолданылуы ықпал етті. Олардың қатысуымен өткен жылы 221 ЖКО тіркелді, өкінішке қарай 17 адам қаза тауып, тағы 583 адам дене жарақатын алды.
Бұзушылықтар үшін 84 мыңнан астам мопед жүргізушілері мен самокат пайдаланушылары әкімшілік жауапкершілікке тартылды.
Жергілікті рейдтер нәтижесінде 1700 мопед мамандандырылған айыппұл тұрағына қойылды.
2024 жылы Алматы жолдарында ЖҚЕ бұзудың 4,2 миллионнан астам дерегі анықталды. 2508 жүргізуші көлікті мас күйінде басқарғаны үшін ұсталып, көлік жүргізу құқығынан айырылды.