Атырауда 554 жол-көлік оқиғасы еурохаттама арқылы рәсімделді, – деп хабарлайды kazlenta.kz тілшісі Polisia.kz сайтына сілтеме жасап.
2024 жылы Атырау облысында жүргізушілер арасында «Еурохаттама» мобильді қосымшасы кеңінен қолданылып, оның көмегімен 554 жол-көлік оқиғасы жеңілдетілген тәртіпте рәсімделді. Енді ұсақ жол-көлік оқиғаларына қатысушылар полиция шақырмай-ақ және сотқа жүгінбей-ақ сақтандыру өтемақысын рәсімдей алады.
Еурохаттама жол-көлік оқиғасын рәсімдеудің заманауи әдісі. Бұл қосымша арқылы жүргізушілер жол-көлік оқиғасын тіркеп, материалдық шығынды өтеу үшін сақтандыру компанияларына өтінім жібереді. Еурохаттаманы рәсімдеу үшін бірнеше маңызды шарттар сақталуы қажет:
1. Жол-көлік оқиғасына тек екі көлік қатысуы тиіс.
2. Екі жүргізушінің де қолданыстағы сақтандыру полистері болуы қажет.
3. Жүргізушілер арасында келіспеушілік болмауы керек.
4. Жол-көлік оқиғасында денсаулыққа зиян келтірілмеген жағдайда және көлікке келтірілген залал сомасы 100 АЕК-тен (369 000 теңге) аспауы тиіс.
Оқиғаны тіркеу үшін жүргізушілер «Еурохаттама» қосымшасын смартфонға жүктеп, тіркеуден өтуі қажет. Сонымен қатар қосымшаға оқиға орнынан түсірілген фото және видео материалдарды жүктеу арқылы рәсімдеу жүзеге асырылады. Қажет болған жағдайда, қосымшаны пайдалану бойынша көмек алу үшін жақын жердегі полиция бөлімшесіне жүгінуге болады.
Еурохаттаманың басты артықшылықтары:
Ұсақ жол-көлік оқиғаларын рәсімдеу үшін полицияны шақырудың қажеті жоқ.
Жүргізушілер әкімшілік жауапкершілікке тартылмайды.
Әкімшілік және сот рәсімдерінің болмауы сақтандыру төлемін алу мерзімін айтарлықтай қысқартады. Бұрын бұл үдеріс 30-дан 90 күнге дейін созылса, қазір еурохаттама рәсімделген сәттен бастап төлем небәрі 5 күн ішінде жасалады.
Еурохаттама – жүргізушілерге ыңғайлы, уақыт үнемдейтін және қосымша шығындарды болдырмайтын заманауи шешім. Бұл бастама өңірдегі жол қозғалысын реттеуді оңтайландырып, ұсақ жол-көлік оқиғаларының әкімшілік рәсімдерін жеңілдетуге үлкен үлес қосуда.