Павлодар тұрғыны туысын сабырға шақыруды өтінді, бірақ өзі кінәлі болып шықты, – деп хабарлайды kazlenta.kz тілшісі Polisia.kz сайтына сілтеме жасап.
Жаңа жылдық мерекелерге орай Павлодар қаласының тұрғыны қайын енесі тарапынан тыныштық бермейді деп полицияға шағымданды. Алайда оқиғаның ақ-қарасын анықтаған тәртіп сақшылары ер адамның өзі кінәлі екенін айқындады.
Оқиға барысына үңілсек, күндіз үйде туыстар жиналып, мерекелік отырыс ұйымдастырылған. Дастарқан басында тұрмыстық жағдайларға байланысты сөзге келіспеушілік орын алып, арты жанжалға ұласқан.
Осы жағдайға байланысты үйдің иесі, әйел адам, күйеу баласының әдепсіз мінез-құлқын айтып, оның балағат сөздер айтып, физикалық зорлық-зомбылықпен қорқытқанын жеткізді. Өз кезегінде күйеу бала қайын енесін барлық сәтсіздіктеріне айыптап, керісінше, өзін жәбірленуші ретінде көрсетуге тырысқан.
Тәртіп сақшылары жанжалға қатысушылардың барлығын тыңдап, қонақтардың куәлігі бойынша жанжалдың басты кінәгері күйеу бала екенін анықтады. Ол мас күйінде тәртіп бұзып, жақындарына тыныштық бермеген.
– Барлық дәлелдерді ескерген полиция қызметкерлері ер адамның отбасылық-тұрмыстық қатынастар аясындағы заңсыз әрекеттері үшін жауапқа тартты. Материал сотқа жіберіліп, сот шешімімен ол 10 тәулікке әкімшілік қамауға алынды. Айта кетерлігі, жыл басынан бері Павлодар облысында тұрмыстық құқық бұзушылықтары үшін 25 азамат әкімшілік жауапкершілікке тартылды, – дейді облыстық полиция департаментінің баспасөз қызметі.
Қоғамдық тәртіп пен азаматтардың қауіпсіздігін қамтамасыз етуге бағытталған «Заң және тәртіп» қағидаты ішкі істер органдарының қызметінің басты ұстанымы болып қала береді. Әр құқық бұзушы өз әрекеттері үшін міндетті түрде жауапқа тартылады.