Көлік полицейлері есірткі саудасы және қару-жарақ сақтау дерегі бойынша күдіктіні ұстады, – деп хабарлайды kazlenta.kz тілшісі Polisia.kz сайтына сілтеме жасап.
Көліктегі полиция департаментінің қызметкерлері жедел-іздестіру шаралары барысында 32 жастағы, бұрын бірнеше рет сотталған Шымкент қаласының тұрғынын ұстады. Ол есірткі заттарын заңсыз сатумен айналысты деген күдікке ілінді.
Күдіктінің үйін тінту барысында полицейлер «марихуана» есірткі затын, бақшасында өсірілген қарасораның екі бұтасын, сондай-ақ заңсыз сақталған қару-жарақ пен оқ-дәрілерді анықтады. Атап айтқанда: ТОЗ-63 үлгісіндегі тегіс ұңғылы шолақ мылтық, 5,45 мм калибрлі 74 оқ-дәрі, 3 дана «Сайга» патроны, 1 дана ТТ тапаншасына арналған бос патрон, сондай-ақ 16 мм калибрлі 17 аңшылық гильза тәркіленді.
Аталған деректер бойынша бірқатар қылмыстық істер қозғалып, сотқа дейінгі тергеу амалдары жүргізілді. Шымкент қаласының қылмыстық істер жөніндегі мамандандырылған ауданаралық сотының үкімімен сотталушы кінәлі деп танылып, 5,5 жыл мерзімге бас бостандығынан айырылды.