Түркістан облысында браконьерлерден мың метрден астам «қытай торы» тәркіленді, – деп хабарлайды kazlenta.kz тілшісі Polisia.kz сайтына сілтеме жасап.
Браконьерліктің алдын алу, болған қылмыстарды анықтау бағытында Шардара ауданында 2 тәулік бойы рейд жүргізілді. Онда Түркістан облысы полиция департаментінің табиғатты қорғау инспекторлары, Шардара аудандық полиция бөлімінің қызметкерлері, прокуратура, Арал – Сырдария бассейндік балық инспекциясы мен Балық су қорғау инспекторлары бірлесіп, тексеру жүргізді.
Нәтижесінде жұмысшы топпен 1 қылмыстық құқық бұзушылық анықталды. Нақтырақ айтсақ, Шардара су қоймасының бойынан 25 жастағы тұрғын рұқсат етілмеген ау-торымен заңсыз балық аулап жүрген жерінен анықталды. Тексеру кезінде жас жігіттен 103 келі балық алынды.
Аталған жайт бойынша ҚР ҚК-нің 335-бабы (Балық ресурстарын, басқа да су жануарларын немесе өсімдіктерін заңсыз алу) бойынша тергеу жүргізілуде.
Жалпы браконьерлерден 115 келі балық, 3 дана үрмелі қайық, 1265 метр «қытай торы» тәркіленді. Одан бөлек Шардара су қоймасында қалып қойған 6 мың метрге жуық «қытай торлары» табылып, тазартылды. Бұл бағыттағы жұмыстар тәртіп сақшыларымен жалғаса береді.