Президент Қасым Жомарт Тоқаевтың Жолдауында айтылған негізгі басымдықтың бірі - халық үніне құлақ асатын мемлекет позициясы. Бұл жүйеде Үкіметтен бастап жергілікті әкмдіктер - азаматтардың ойларымен, идеяларымен және пікірлерімен алмасу үшін қолжетімді және ыңғайлы платформаларды ұсынады. Осы мақсатта Шымкент қаласының әкімі Ғабит Сыздықбеков тұрғындармен көшпелі кездесу өткізді, деп хабарлайды kazlenta.kz тілшісі Шымкент қаласы әкімдігінің баспасөз қызметіне сілтеме жасап.
Жаңа форматтағы кезекті жүздесу Абай ауданындағы Самал-2, Шұғыла, Ынтымақ-2, Қызылжар, Жайлау және Алтынтөбе шағын аудандары мен тұрғын алаптарында ұйымдастырылды. Қала тұрғындары толғандырған сұрақтарын жолдап, қаланы дамытуда ұсыныстарымен бөлісті.
Сонымен қатар елді мекендерде мектеп, шағын футбол алаңын, мешіт, балабақша және мәдениет үйін салу мүмкіндіктері талқыланды. Азаматтар тарапынан көтерілген кей мәселелер кездесу барысында шешімін тапты. Аудан әкімдігіне және тиісті басқармалардың басшыларына туындаған мәселелерді келесі жылдың жұмыс жоспарына енгізу тапсырылды. Қала берді, аула аумақтарын абаттандыру мен көгалдандырудың, жасыл желектерді суарудың, балалар және спорт алаңдарын салудың өзекті мәселелері талқыланды.
Шымкент қаласының әкімі Ғабит Сыздықбеков жоғарыда аталған шаралар - қала тұрғындарының өмірі үшін қауіпсіздік пен қолайлы жағдайларды қамтамасыз ету жөніндегі басым міндет екенін атап өтті. Бұл бағыттағы жұмыстар тұрғындардың талап-тілектері бойынша жалғасатын болады.
Шымкенттіктер тұрақтарды кеңейту, тұрғын-үй қорын жаңғырту бағдарламасы шеңберінде үйлерді жөндеу, жер учаскелерін заңдастыру, тұрғын үйге кезекке қою, жылу желілерін жөндеу және ирригациялық жүйелерге қатысты мәселелерді де көтерді. Сонымен қоса үйлерді күтіп ұстап, жөндеуді, жалпы үй мүлкінің сақталуын қамтамасыз ету мақсатында үшінші мегаполис басшысы басқару органын, яғни мүлік иелерінің бірлестігін немесе жай серіктестікті құру қажеттігін ерекше атап өтті. Кездесу соңында қала әкімі сындарлы диалогқа уақыт бөлген тұрғындарға алғысын білдірді. Азаматтар өтініштерінің назардан тыс қалмайтынын да жеткізді.