Жуырда, Шымкенттік мектеп оқушылары пластикті жейтін бактерия ойлап тапты. Бұл ғылыми жоба әлемде экологиялық деп танылып отыр. Назарбаев зияткерлік мектебінің оқушылары гендік-инженерлік машиналар халықаралық байқауында дәл осы ғылыми еңбегімен Парижден алтын медальмен оралды. Онда олар жақсартылған бактерияларды негізге ала отырып жұмыс жасаған. Бұл бактериялардың ұқсастары табиғатта бар, бірақ олардың метаболикалық процестері баяу, -дейді зерттеушілер. Зияткер оқушылар оларды жылдамдатудың жолын ойлап тапты. Көптеген зерттеулер жүргізілді. Соның ішінде еліміздегі ірі университеттің базасында біраз тер төгуге тура келген. Өйткені бұл мақсатқа әзірге мектепте қажетті зертханалар қарастырылмаған. Алайда, жасалған бактерия табиғатқа шығарыла алмайды, оны тек өнеркәсіптік жағдайларда биореакторда қолдануға болады.
"Прототипті оқушылар өздері жасады. Тіпті қоқыс өңдейтін зауыттардың бірі жобаға қызығушылық танытып та үлгерді. Өйткені, пластик ғасырлар бойы ыдырап, қоршаған ортаны ластайтыны белгілі. Адам денсаулығына да, қоршаған ортаға да зиянсыз Pseudomonas putida сияқты бактерия бар, оның ыдырауына жауап беретін Ideonella sakaiensis бактериясының генін алуды жөн көрдік. Біздің бактериялардың метаболизм жылдамдығы жоғары болады. Мәселен, бактериялардың бір граммы биореакторда 1-2 сағат ішінде 80 грамм пластикті ыдыратады. Осылайша әлемді алаңдатқан экология мәселесін оңтайландыруға мүмкіндік тумақ", - дейді жобаның ғылыми жетекшісі, биолог Жанна Өтебаева.