Шымкентте қолөнершілер форумы өтті. Іс-шараны Visit Shymkent туристік ақпараттық орталығы «Artisans of Shymkent» атауымен ұйымдастырды. Мұндағы мақсат - ұлттық қолөнерді жандандырып, этнотуризмді дамыту.
Форумға жергілікті және өзге облыстардан 65 қолөнерші қатысып, өз бұйымдарын көпшілік назарына ұсынды. Ерекше сарында өткен іс-шара – әр аймақ қолөнершілерінің басын қосып, өзара тәжірибе алмасуға, қолөнер қауымдастығы арасындағы байланысты нығайтуға бағытталған. Аталмыш форумға алғаш рет қатысып жатқандар да бар. Солардың бірі Жәнерке Байбосынова. Жас суретші жапон елінің анимациялық кейіпкерлерін қазақи стильде үйлестіріп, ұлттық киім-кешекте әрлеп бейнелеген.
Рухани шара қолөнер шеберлігін дамытуға және жаңа буынды шабыттандыруға ықпал етпек. Әр аймақтан келген 65 қолөнерші тоқыма, құрақ, зергерлік бұйымдарды көпшілік назарына ұсынды. Форумда көрмемен қатар, панельдік сессия өтті. Онда сала мамандары өздерінің көпжылдық қалыптасқан іс-тәжірибелерімен бөлісті. Сондай-ақ, кәсіпкерлер палатасының мамандары он саусағынан бал тамған шеберлерге кәсіп жүргізудің тиімді жолдарын үйретіп, мастер класс сабақтарын ұйымдастырды.Іс-шара қорытындысы бойынша, форум аясында ұйымдастырылған бірнеше байқаулардың жеңімпаздары мен қатысушыларға сертификаттар мен алғыс хаттар табысталды.
Айта кетейік, бүгінде өңірде қазақ қолөнерін шетелдерге дәріптеп жүрген Қазақстан Қолөнершілері Одағының 23 мүшесі бар. Әр туындысында ұлттық нақышта салт-дәстүріміз бен қазақи болмысымызды бейнелей білген шеберлер бұған дейін Үндістан, Малайзия, Түркия, Түрікменстан, Непал, Қытай, Тайланд елдерінде болып қайтты.