Қазақстан ISO Халықаралық стандарттау ұйымындағы белсенділігін арттырды. Қазіргі уақытта ISO кеңесіне және оның техникалық басқару бюросына қосылу бойынша жұмыстар жүріп жатыр. Бұл туралы Сауда және интеграция министрлігі Техникалық реттеу және метрология комитетінің баспасөз қызметінен мәлімдеді, деп хабарлайды ҚазАқпарат-қа сілтеме жасаған kazlenta.kz
Комитет мәліметінше, бұл қадам осы ұйымның саясатын қалыптастыру және өзекті мәселелеріне араласуға, еліміздің ұлттық мүддесін ілгерілетуге мүмкіндік береді.
«Әлемдік тәжірибеде ұлттық кәсіпорындар стандарттарды әзірлеу жұмыстарына белсенді қатысады, оларды әзірлеуге қаражат салады. Сол арқылы өнеркәсіптің мүддесін ұлттық нарықта да, әлемдік нарықта да ілгерілетуді қамтамасыз етеді. Бұл елдің жалпы экономикасына және жекелеген кәсіпорындарға тікелей әсер етеді», - деді Техникалық реттеу және метрология комитеті төрағасының орынбасары Жанна Есенбекова.
Сонымен қатар, Қазақстан 3 жаңа халықаралық стандарттау жобасын әзірлеу жөнінде ұсыныстар енгізген. Құзырлы органның дерегінше, электротехникалық өнімдерді сынау нәтижелерін растаудың жаһандық жүйесіне қосылу жұмыстары қолға алынған.