Әлеуметтік желіде тараған бейнежазба Қарағанды облысының полицейлеріне жол қозғалысы ережесін өрескел бұзған жүргізушіні анықтауға көмектесті, деп хабарлайды kazlenta.kz тілшісі Polisia.kz сайтына сілтеме жасап.
Алайда мемлекеттік тіркеу нөмірлерін шешіп, көлігін жасыру арқылы жауапкершіліктен құтылмақ болған 19 жастағы астаналықтың әрекеті нәтижесіз аяқталды. Оқиға әлеуметтік желіде жарияланған бейнежазбадан кейін белгілі болды. Кадрларда мемлекеттік тіркеу нөмірінсіз қозғалған Kia Rio автокөлігінің бағдаршамның тыйым салынған сигналына өткені байқалады. Бейнежазбаны назарға алған полицейлерлер қалалық бейнебақылау камералары арқылы көліктің қозғалыс бағытын анықтап, оны іздестіруге кірісті.
Жедел тексеру барысында автокөлік жасырылған болуы мүмкін шағын аудан да анықталды. Көп ұзамай тәртіп сақшылары 19 жастағы Астана қаласының тұрғынын жасырылған көлігіне мемлекеттік тіркеу нөмірлерін қайта орнатуға әрекеттеніп жатқан жерінен ұстады. Тексеру кезінде ол нөмірлерді жол ережесін бұзғаны үшін жауапкершіліктен жалтару мақсатында әдейі шешіп алғанын растады. Жүргізушіге қатысты әкімшілік хаттамалар толтырылып, автокөлік айыптұраққа қойылды. Көлігін қайтарып алу үшін ол белгіленген тәртіппен тиісті рәсімдерден өтіп, айыппұлдар бойынша берешегін өтеуі қажет. Полиция жүргізушілерді жол қозғалысы ережелерін сақтауға шақырады. Мемлекеттік тіркеу нөмірін шешіп алу немесе жасыру жауапкершіліктен босатпайды. Құқық бұзушылықтар бейнебақылау камералары арқылы да анықталады.