Түркістан облысында жол ережесін өрескел бұзған жүргізуші ұсталды, деп хабарлайды kazlenta.kz тілшісі Polisia.kz сайтына сілтеме жасап.
Республикалық маңызы бар Шымкент – Самара автожолында жылдамдықты автоматты түрде тіркейтін камераға жол ережесін өрескел бұзған KIA автокөлік жүргізушісі түсіп қалған. Көліктің мемлекеттік тіркеу нөмірі белгіленген орында болмай, оның орнына жүргізушінің Шако деген лақап аты жазылғаны анықталды. Камерадан алынған ақпаратты зерделеген патрульдік полиция батальонының қызметкерлері аталған көліктің қозғалыс бағытын анықтап, Шымкенттен Түркістан бағытына қарай жүріп бара жатқан жерінен тоқтатты. Тексеру барысында көлікті 32 жастағы Түркістан қаласының тұрғыны басқарғаны белгілі болды.
Полиция қызметкерлері жүргізушіге мемлекеттік тіркеу белгілерінсіз көлік құралын басқарудың заң талаптарына қайшы екенін түсіндіріп, әкімшілік шара қолданды. Көлік айыптұраққа қойылды. Полиция азаматтарды жол қозғалысы ережелерін сақтап, көлік құралдарын белгіленген талаптарға сәйкес пайдалануға шақырады. Автоматты тіркеу жүйелері құқық бұзушылықты анықтауға ғана емес, жолдағы тәртіпті қамтамасыз етуге бағытталған.