Ресейде 5 шілдеден бастап әуе кеңістігін пайдалануға қойылған шектеулерге байланысты әуе компаниялар 485 рейсті тоқтатты, шамамен 2 мың рейс кешіктірілді, - деп хабарлайды kazlenta.kz тілшісі Tengrinews.kz сайтына сілтеме жасап.
Росавиацияның мәліметінше, 5 шілдеден бастап әуе компаниялар 485 рейсті тоқтатқан, 88 рейс қосалқы әуежайларға бағытталған. Ұшып кетуі мен қонуы кешіктірілген рейстер саны - 1,9 мың. 43 мың билет кері қайтарылған, 94 мың жолаушы қонақүйлерге орналастырылған. 199 мың сусынға, 155 мың тамаққа арналған ваучер берілген.
"Жағдай толық бақылауда және тұрақтанып келеді. Ресейдің әуе тасымал жүйесі сырттан болған кедергілерге төтеп бере алатынын көрсетті. Қазіргі қиын жағдайда жұмыс істеуге әуе компанияларда жеткілікті мүмкіндік бар", - делінген хабарламада.
Росавиация барлық тиесілі қызмет жолаушыларға көрсетіліп жатқанын атап өтті.
Көлік министрі қызметінен босатылды
Ресейдегі әуе тасымалындағы ахуалға байланысты дүйсенбіlt Көлік министрі Роман Старовойт қызметінен босатылды.
Ресей президенті Владимир Путин Андрей Никитинді көлік министрінің міндетін атқарушы етіп тағайындады.
Айта кетейік, өткен аптада Ресей мен Украина бір-біріне қарсы шабуыл жасағанын хабарлады. Украина президенті Владимир Зеленский Ресей тарапынан жасалған шабуылды "ең ауқымды шабуылдардың бірі" деп атады. Ең көп зардап шеккен - Киев қаласы. Ал Ресейдің бірнеше қаласына дрондар шабуыл жасаған. Ресейлік басылымдардың мәліметінше, Ростов облысына жасалған дрон шабуылы салдарынан зейнеткер әйел қаза тапқан.