Павлодарда полицейлер такси жүргізушісіне көмек көрсетті, – деп хабарлайды kazlenta.kz тілшісі Polisia.kz сайтына сілтеме жасап.
Қыс мезгілінде алыс жолда қиындыққа тап болған жүргізушілер мен жолаушылар үшін полиция қызметкерлерінің уақтылы көмегі аса маңызды. Бұл жолы Павлодар облысының полиция қызметкерлері көмекке мұқтаж азаматтарға қол ұшын созып, шынайы кәсібиліктерін танытты.
Павлодар – Астана тас жолын патрульдеу кезінде тәртіп сақшылары Қуан Тілеубергенов пен Сартай Асқар Достық ауылы маңында түнгі уақытта жол шетінде тұрған Hyundai Starex автокөлігін байқап, дереу тоқтады.
Көлік жүргізушісі елорда тұрғыны, Астанаға жолға шығып, төрт жолаушыны бірге алғанын айтты. Алайда, сапар барысында көліктің антифризі таусылып, қозғалтқыш тоқтап қалған. Жүргізуші сол жерде шамамен бір сағаттай тұрып, ешбір көліктің тоқтамағанын жеткізді.
Полицейлер жағдайды дереу бақылауға алып, көлікті тексеріп, ақаудың себебін анықтады. Жолаушыларды өздерінің қызметтік көлігіне отырғызып, ыстық шай беріп жылытып, Астанаға бағыт алған келесі көлікке отырғызып жіберді. Кейін эвакуатор шақырып, бұзылған көлікті тиеп, жүргізушімен бірге елордаға дейін жеткізіп салды.
Жүргізуші мен жолаушылар полицейлерге шексіз алғыстарын білдірді.
– Егер инспекторлар болмаса, бізге көмек қанша уақытқа дейін келерін білмей дал болар едік. Олар өз қызметтік міндетін адал атқарып қана қоймай, осындай қиын жағдайларда да көмек қолын созады екен. Полиция қызметкерлеріне мықты денсаулық пен жұмыстарына сәттілік тілеймін, – деп алғысын жеткізді елорда тұрғыны.
Павлодар облысының полиция департаменті жүргізушілерге қысқы маусымда көліктерінің техникалық жағдайын мұқият тексеріп, сапар алдында қажетті отын мен техникалық сұйықтықтар қорын дайындап алуды ескертеді.
– «Заң және тәртіп» қағидаты ішкі істер органдары қызметінің негізі болып қала береді. Біздің басты мақсат – азаматтардың қауіпсіздігін қамтамасыз етіп, қоғамдық тәртіпті сақтау, – деп атап өтті департамент өкілдері.
Осындай оқиғалар полиция қызметінің тек қауіпсіздік қамтамасыз етумен шектелмей, адамдарға көмек көрсетудегі маңызды рөлін дәлелдей түседі.