Кеше түнде Атбасар қаласында бес қабатты көппәтерлі тұрғын үйдің бірінде өрт шықты. Өрт сөндіру барысында өрт сөндірушілер үш адамды құтқарды. Тағы алты адам эвакуацияланды. Оның ішінде үшеуі бала. Өкінішке орай, өрт болған пәтерде 1966 жылы туған ер адамның денесі табылды. Бұл туралы ТЖМ ресми өкілі Талғат Уәли хабарлады.
Өрттің шығу себебі анықталуда. Өртті сөндіруге ТЖ департаментінің жеті қызметкері мен екі техникасы жұмылдырылды. Оқиға орнында аудандық полиция бөлімінің кезекші жедел-тергеу тобы жұмыс істеді.
«26 минут ішінде өрт толығымен сөндірілді. Өрт үшінші қабаттағы пәтерлердің бірінде шыққан. Үй заттары мен жиһаздар өртенген. Өрт кезінде төмеңгі қабатта тұратын тұрғындар үйлерінен өздігімен шығып кеткен. Жоғарғы қабаттардағы тұрғындар қалың түтіннің салдарынан өмен түсе алмады. Өрт сөндірушілер әр пәтерді тексеріп, онда адамдар болған кезде оттегі маскасын киіп, таза ауаға шығарды», - деді Талғат Уәли.
ТЖМ азаматтарға тұрмыста өрт қауіпсіздігі қағидаларын сақтау қажеттігін еске салады.